Akademikong Pagsulat tg5t

PAGSULAT sa FILIPINO sa Piling Larangan: Akademik

Introduksiyon sa Akademikong Pagsulat

Layuning Pampagkatuto: 1. Nauunawaan ang ilang pananaw sa pagsulat. 2. Nabibigyang-kahulugan ang akademikong pagsulat. 3. Nakikilala ang iba’t ibang akademikong sulatin ayon sa: a. Layunin b. Gamit c. Katangian d. Anyo

Panimula: Isa sa mga pinakamahirap hasaing kasanayan sa komunikasyon ang pagsulat. Totoong ang pagsulat ay isang komplikadong proseso na nangangailangan ng sapat na panahon upang maging mahusay dito. Hindi natin ito dapat katakutan dahil ang pagsasanay sa pagsulat ay nagdudulot ng higit na pagkatuto at pagunlad ng ating pagkatao.

Para sa maraming kabataan, sapat na umano ang kanilang husay sa pagbasa at pagsasalita. Sinasabi nilang hayaan na lamang ang pagsulat sa mga akademiko, makata, o kuwentista. Ngunit hindi ito ang dapat isaisip. Kailangang linangin ang pagsusulat upang higit na mapalawak ang ating kaalaman at mapaunlad ang ating kaisipan sa gitna ng malalaking pagbabago sa ating mundo. Patuloy ang ebolusyon ng teknolohiya sa komunikasyon, sumisikip-lumalawak ang mundo dahil sa globalisasyon,tumatatag ang ugnayan ng mga bansa

dahil sa nangyayaring integrasyon ng mga ekonomiya – lahat ng ito ay nakaaapekto sa maraming aspekto ng buhay, personal man o propesyonal. Kung nais makaungos sa tumitinding kompetisyon, isa sa mahahalagang opsiyon ang linangin ang kakayahan sa pagsulat, partikular sa akademikong pagsulat. Tandaan, walang ipinanganak na mahusay magsulat. Ito ay isang kasanayang nililinang.

Modyul 1: Kahulugan at Kalikasan ng Akademikong Pagsulat Mga Batayang Kaalaman sa Pagsulat * Ang pagsulat ay ang masistemang paggamit ng mga grapikong marka na kumakatawan sa espisipikong lingguwistikong pahayag (Rogers, 2005). Ibig sabihin, may natatanging simbolo (mga titik, bantas, at iba pang marka) para sa

bawat ponema o tunog, at ang mga simbolong ito ang ginagamit sa pagsusulat ng mga pahayag. * Ang pagsulat ay sistema ng permanente o malapermanenteng pananda na kumakatawan sa mga pahayag (Daniels & Bright, 1996). Permanente dahil nakasulat o nakaukit ang mga pananda sa papel, kahoy, bato, at iba pang materyal.

* Masistema ang pagsulat dahil bawat pananda ay may katumbas na makabuluhang tunog at isinaayos ang mga panandang ito upang makabuo ng makabuluhang salita o pangungusap. Masistema ang pagsulat dahil ginagabayan ito ng mga batas sa gramatika. * Ang pagsulat ay nakadepende sa wika. Kung walang wika, walang pagsulat.

* Arbitraryo ang mga sistema ng pagsulat. Napagkasunduan ang tumbasan ng mga titik, ang kahulugan ng salita, ang kabuuan ng pagpapahayag. Sa ibang salita, nag-iiba-iba ang sistema ng pagsulat depende sa wika at kultura. Hal. Aso * Ang pagsulat ay isang paraan ng pagrerekord at pagpepreserba ng wika.

* Komunikasyon ang isa sa mga pangunahing layunin ng pagsulat (Fischer, 2001). * Ang pagsulat ay simbolong kumakatawan sa kultura at tao. * Ang pagsulat ay pundasyon ng sibilisasyon (Goody, 1987).

Mahalagang Ideya:

Ang pagsulat ay alinmang sistema ng komunikasyong nakabatay sa kumbensiyonal (mala) permanente, at nakikitang simbolo. *

Subukin ang Natutuhan 1. Saan nakadepende ang pagsulat? 2. Bakit sinasabing masistema ang pagsulat? 3. Ano ang kaibahan ng panandang nakikita (titik, bantas, marka) sa panandang naririnig? 4. Paano nagiging kasangkapan ng komunikasyon ang pagsulat? 5. Paano nagiging arbitraryo ang sistema ng pagsulat? Magbigay ng mga halimbawa.

Akademikong Pagsulat o Intelektuwal na Pagsulat: - isa itong uri ng pagsulat na kailangan ang mataas na antas ng pag-iisip. Ang mahusay na manunulat ng akademikong teksto ay may mapanuring pag-iisip. May kakayahang mangalap ng impormasyon o datos, magorganisa ng mga ideya, mag-isip nang lohikal, magpahalaga sa orihinalidad at inobasyon, at magsuri at gumawa ng sintesis.

Mahalagang Ideya:

Ang akademikong pagsulat ay intelektuwal na pagsulat na nagaangat sa antas ng kaalaman ng mga mambabasa. Hindi ito opsiyon para sa mga akademiko at propesyonal. Ito ay isang pangangailangan.

Mga halimbawa ng Akademikong Teksto o Sulatin: * Abstrak * Bionote * Sintesis / Buod * Panukalang Proyekto * Talumpati * Posisyong Papel

* Agenda * Pictorial/Photo Essay * Lakbay-Sanaysay o Travel Essay * Katitikan ng Pulong * Replektibong Sanaysay

Pagnilayan: 1. Ano ang pananaw mo sa akademikong pagsulat? 2. Sa iyong palagay, ano-ano ang mga halimbawa ng akademikong sulatin na mahirap at madaling isulat? Bakit? 3. Masasabi mo bang taglay mo ang mga katangian ng isang mahusay na manunulat ng akademikong teksto? Ipaliwanag.

Subukin ang Natutuhan: (½ crosswise) 1. Bakit mahalaga ang kasanayan sa akademikong pagsulat? 2. Bakit tinatawag na intelektuwal na pagsulat ang akademikong pagsulat? 3. Anong penomeno ang nagtutulak sa mga Pilipino na maging kompetetibo? Ipaliwanag. 4. Paano nakasusulat ng isang mahusay na akademikong sulatin? 5. Maliban sa mga nabanggit na, magbigay ng iba pang halimbawa ng akademikong sulatin.

Modyul 2: Pagkilala sa Iba’t ibang Akademikong Sulatin Layunin: Akademikong Pagsulat Impormatibong akademikong sulatin 1. Nagbibigay ng kaalaman at paliwanag. Hal. balita, lahok sa encyclopedia, ulat na nagpapaliwanag sa estadistika, papel na nagpapaliwanag ng konsepto, sulatin tungkol sa kasaysayan, tesis, etc….. Malikhaing akda o personal na akda (akademikong teksto) 2. Nagbibigay ng aliw. Hal. autobiography, diary, memoir, liham Kritikal o akademikong akda (paraang malikhain) Hal. rebyu, pagsusuri, talang pangkasaysayan

Akademikong sulating Nanghihikayat 1. Kumbinsihin o impluwensiyahan ang mambabasa na pumanig sa isang paniniwala, opinyon o katuwiran. Hal. konseptong papel, mungkahing saliksik, posisyong papel, manifesto, editorial, talumpati Tandaan: May mga akademikong sulating naghahalo ang layunin, kung hindi nakasisiguro kung paano uuriin ang ganitong sulatin…. Iba ang pangunahing layunin ng panghihikayat sa pangunahing layunin ng pagbibigay ng impormasyon. Kapag malinaw sa iyo ang dahilan ng iyong pagsulat, matutukoy mo ang mga estratehiyang magagamit sa pagtugon sa layunin ng iyong akda.

Subukin ang Natutuhan: 1. Ano-ano ang mga pangunahing layunin sa akademikong pagsulat? 2. Bakit mahalagang malaman ang layunin kapag nagsusulat ng akademikong teksto? 3. Paano nagiging akademikong sulatin ang isang autobiography o memoir? 4. Magbigay ng sitwasyong ginagamit ang sulating nanghihikayat. 5. Sa iyong palagay, ano ang mangyayari kung hindi malinaw sa iyo ang layunin ng isusulat?

Katangian: * Pormal ang tono * Karaniwang sumusunod sa tradisyonal na kumbensiyon sa pagbabantas, grammar, at baybay. * Organisado at lohikal ang pagkakasunud-sunod ng mga ideya. * Hindi maligoy ang paksa. * Pinahahalagahan ang kawastuhan ng mga impormasyon. * Karaniwang gumagamit ng mga simpleng salita upang maunawaan ng mambabasa * Hitik sa impormasyon * Bunga ng masinop na pananaliksik.

Magkaiba ang personal at akademikong pagsulat. Sa personal na pagsulat, maaaring impormal ang wika nito. Maaari ding magaan ang tono at kumbersasyonal ang wika. Madalas ay maligoy ang paglalahad ng personal na pagsulat na karaniwan ding nangangailangan ng hindi literal na pagbasa. Ngunit dahil ang pagsulat ay patuloy na nagbabago, may ilang manunulat na pinagsasanib ang mga kumbensiyon sa akademikong pagsulat at malikhaing pagsulat sa pagbuo ng akademikong teksto.

Pamantayan: Walang isang paraan sa pagsusulat ng mahusay na akademikong teksto. Depende sa sitwasyon o kahingian, nagbabago-bago ang mga pamantayan kung ano ang mahusay na estilo o nilalaman. Ang mga guro ay may kani-kaniya ring hinahanap kapag binabasa ang mga sanaysay ng kanilang mga estudyante. May gabay sa pagsulat ang mga mamamahayag na kaiba sa gabay sa pagsulat na sinusunod sa isang advertising agency. (empleyado, HR head, manager, supervisor, namamahala sa laboratory, etc….) Sa madaling salita, tuwing magsusulat ng akademikong teksto, mahalagang alamin kung sino ang magbabasa nito.

Subukin ang Natutuhan: 1. Ano-ano ang mga kaibahan ng akademikong pagsulat sa personal na pagsulat? 2. Maaari bang gawing malikhain ang isang akademikong sulatin? Pangatwiranan ang sagot? 3. Bakit walang “isang paraan” ng pagsusulat ng mahusay na akademikong teksto? 4. Bakit mahalagang alamin kung sino ang mambabasa kapag magsusulat ng akademikong teksto?

Mga Gamit: Akademikong Pagsulat Gumamit ng mga hulwaran upang maging organisado at malinaw ang daloy ng mga ideya sa akademikong sulatin kapag magbabasa ng sanaysay, encyclopedia, balita, batayang aklat at iba pang akademikong sulatin. * Depinisyon – pagbibigay ng katuturan sa konsepto o termino (pormal na depinisyon, kasingkahulugan, etimolohiya o pinanggalingang salita) * Enumerasyon – pag-uuri o pagpapangkat ng mga halimbawang nabibilang sa isang uri o klasipikasyon (ayon sa uri, lahi, kasarian, panahon, interes at iba pa) * Order – pagsusunud-sunod ng mga pangyayari o proseso.

(kronolohiya ng mga pangyayari proseso ng pagluluto, pagkakasunod-sunod ng mga pangyayari) * Paghahambing o Pagtatambis – pagtatanghal ng pagkakatulad o pagkakaiba ng mga tao, lugar, pangyayari, konsepto at iba pa. * Sanhi at Bunga – paglalahad ng mga dahilan ng pangyayari o bagay at ang kaugnay na epekto nito. * Problema at Solusyon – paglalahad ng mga suliranin at pagbibigay ng mga posibleng lunas sa mga ito. * Kalakasan at Kahinaan – paglalahad ng positibo at negatibong katangian ng isa o higit pang bagay, sitwasyon, o pangyayari.

Tandaan: Maaaring gumamit ng higit sa isang hulwaran sa isang akda, lalo na kung ito ay may kahabaan katulad ng kritikal na sanaysay o papel-pananaliksik.

Maaari ding ang isang hulwaran ay buuin ng iba pang hulwaran.

Anyo ng Akademikong Sulatin: * Pamumuna * Anotasyon ng bibliograpi * Manwal * Artikulo sa journal * Ulat * Rebyu sa mga pag-aaral * Sanaysay * Metaanalysis * Balita * White paper * Editoryal * Liham * Encyclopedia * Korespondensiya opisyal * Rebyu ng aklat, pelikula * Autobiography o sining –biswal * Tesis * Memoir * Disertasyon * Plano ng pananaliksik * Papel-pananaliksik * Konseptong papel * Pagsasalin * Mungkahing saliksik

Ilapat ang natutuhan: * Basahin ang mga pahina 3-5 sa artikulong “What is Academic Writing? ni L. Lennie Irvin sa http://parlorpress.com/pdf/Irvin--what-is-academicwriting.pdf. Tungkol ito sa mga mito sa akademikong pagsulat. Bumuo ng grupong may limang miyembro. Pag-usapan ang pitong mitong binasa. Sang-ayon ba kayo sa mga inilalahad ng mga ito? Ibahagi sa klase ang pitong mito at ang inyong napagusapan tungkol dito. Ilahad ito sa klase gamit ang Power Point presentation.

* http://owl.massey.ac.nz/academic-writing/what-isacademic-writing.php * https://owl.english.purdue.edu/owl/section/1/2/ * “What are the key functions in academic writing?” http://www.mheducation.co.uk/openup/chapters/ 9780335227174.pdf * “Forms of Academic Writing” ni Vernetta K. Williams https://usflearn.instructure.com/courses/813386/files/ 30786204/

Proseso sa Pagsulat

1. Bago Sumulat (Prewriting) - brainstorming * malayang mag-isip at magtala ng mga kaalaman at karanasan na may kinalaman sa paksa. * napagpapasiyahan kung ano ang susulatin, ano ang layunin sa pagsulat, at ang estilong gagamitin

2. Habang Sumusulat (Actual Writing)

- pagsulat ng unang burador (first draft) na ihaharap ng bawat isa sa isang maliit na grupo upang magkaroon ng interaksiyon kung saan tatalakayin ang mga mungkahing pagbabago o mga puna. Karaniwang tuon dito ang halaga ng paksa, kabuluhan ng pag-aaral, at lohika sa loob ng sulatin.

3. Pagkatapos Sumulat (Post-Writing) - Sa bahaging ito, ginagawa ang mga pagbabago sa pamamagitan ng pagdaragdag, pagkakaltas, at paglilipat-lipat ng mga salita, pangungusap, o talata. Bilang pangwakas na hakbang, pagtutuunan na ang mekaniks ng sulatin tulad ng baybay, bantas at gramatika.

Sa proseso ng pagsulat, bigyang-pansin ang mga bahagi ng teksto ayon sa sumusunod: 1. Panimula – ang bahaging ito ay nararapat na maging kawiliwili upang sa simula pa lamang ay mahikayat ang mambabasa na tapusing basahin ang eksto.

2. Katawan - sa pagsulat ng bahaging ito, matatagpuan ang wastong paglalahad ng mga detalye at kaisipang nais ipahayag sa akda. Mahalagang magkaroon ng ugnayan at kaisahan ang mga kaisipang ipinahahayag upang hindi malito ang mambabasa dahil ito ang pinakamalaking bahagi ng teksto. a. Pagpili ng organisasyon b. Pagbabalangkas ng nilalaman c. Paghahanda sa transisyon ng talataan

3. Wakas - dapat isaalang-alang ang pagsulat ng bahaging ito upang makapag-iwan ng isang kakintalan sa isip ng mambabasa na maaaring magbigay buod sa paksang tinalakay o mag-iiwan ng isang makabuluhang pagiisip at repleksiyon.

Gawaing Pagsulat: Pumili ng isang pinakamasayang pangyayari sa iyong buhay ngayong taon. Sumulat ng maikling sanaysay hinggil dito. Sundin ang tinalakay na proseso ng pagsulat at mga bahagi ng teksto. Panimula Dapat na ang panimula ay: - isang pangungusap na makatawag-pansin - isang pambungad na salaysay

Katawan Dapat na ang katawan ay: - Pagbabalangkas ng nilalaman (mahahalagang ideya o kaisipan ng mga pangyayari na may wastong pagkakasunod-sunod) Wakas Dapat na ang wakas ay: - Pag-iiwan ng isang makabuluhang diwa o kaisipan

Modyul 3 - Pagsulat ng Abstrak: Ang abstrak, mula sa salitang Latin na abstracum/ abstractus (drawn away o exract from) Harper, 2016, ay ang maikling buod ng artikulo o ulat na inilalagay bago ang introduksiyon. Ito ang siksik na bersiyon ng mismong papel. Ipinapaalam nito sa mga mambabasa ang paksa at kung ano ang aasahan nila sa pagbabasa ng isinulat na artikulo o ulat. Ito ang karaniwang unang tinitingnan ng mambabasa, kaya maituturing itong mukha ng akademikong papel.

Uri, Kalikasan at Bahagi: Abstrak

Ang uri ng abstrak na iyong isusulat ay nakadepende sa paksa o sa disiplinang kinapapalooban nito. Sa kabila ng kaiksian ng abstrak, kailangang makapagbigay pa rin ito ng sapat na deskripsiyon o impormasyon tungkol sa laman ng papel. Ang bahaging bumubuo sa deskriptibo at impormatibong abstrak ay karaniwang isang pangungusap lamang ngunit may kalayaan ang manunulat na maging malikhain kung paano niya aayusin ang mga ito.

DESKRIPTIBONG ABSTRAK:

* Inilalarawan sa mga mambabasa ang mga pangunahing ideya ng papel. * Nakapaloob dito ang kaligiran, layunin at tuon ng papel o artikulo. * Kung ito ay papel-pananaliksik, hindi na isinasama ang pamamaraang ginamit, kinalabasan ng pag-aaral at kongklusyon. * Mas karaniwan itong ginagamit sa mga papel sa humanidades at agham panlipunan at sa mga sanaysay sa sikolohiya.

IMPORMATIBONG ABSTRAK: * Ipinapahayag sa mga mambabasa ang mahahalagang ideya ng papel. * Binubuod dito ang kaligiran, layunin, tuon, metodolohiya, resulta at kongklusyon ng papel. * Maikli ito, karaniwang 10% ng haba ng buong papel at isang talata lamang. * Mas karaniwan itong ginagamit sa larangan ng agham at inhinyeriya o sa ulat ng mga pag-aaral sa sikolohiya.

Mga Hakbang sa Pagsulat ng Abstrak: 1. Basahing muli ang buong papel. Habang nagbabasa, isaalang-alang ang gagawing abstrak. Hanapin ang mga bahaging ito: layunin, pamamaraan, sakop, resulta, kongklusyon, rekomendasyon, o iba pang bahaging kailangan sa uri ng abstrak na isusulat. 2. Isulat ang unang draft ng papel. Huwag kopyahin ang mga pangungusap. Ilahad ang mga impormasyon gamit ang sariling salita.

3. Irebisa ang unang draft upang maiwasto ang anumang kahinaan sa organisasyon at ugnayan ng mga salita o pangungusap, tanggalin ang mga hindi na kailangang impormasyon, magdagdag ng mahahalagang impormasyon, tiyakin ang ekonomiya ng mga salita at iwasto ang mga maling grammar at mekaniks. 4. I-proofread ang pinal na kopya.

Mahalagang Ideya:

Huwag magpapalinlang. Bagaman maiksi, nangangailangan ng mataas na kasanayan sa pagbasa at pagsulat ang pagbuo ng abstrak. Walang halaga ang pag-aaral at kahusayan ng papel kung walang magbabasa nito dahil sa mahinang abstrak.

Upang magkaroon ng ideya kung ano ang abdtrak, maaaring bisitahin ang mga sumusunod na Web site para sa ilang halimbawa nito: * http://www.sccur.uci.edu/sampleabstracts.html

* http://www.willamette.edu/cla/ssrd/abstract_ examples/

Mga Katangian ng Mahusay na Abstrak: 1. Binubuo ng 200-500 salita. 2. Gumagamit ng mga simpleng pangungusap na nakatatayo sa sarili nito bilang isang yunit ng impormasyon. 3. Kompleto ang mga bahagi. 4. Walang impormasyong hindi nabanggit sa papel. 5. Nauunawaan ng pangkalahatan at ng target na mambabasa.

Subukin ang Natutuhan: 1. Ano ang abstrak? 2. Bakit kailangan ng abstrak? 3. Bakit karaniwang inilalagay sa unahan ng papel ang abstrak? 4. Ano-ano ang mga kaibahan ng impormatibo at deskriptibong abstrak ayon sa nilalaman? 5. Bakit mahalagang basahing muli ang buong papel bago isulat ang abstrak? 6. Paano ilalahad sa abstrak ang mga impormasyong nakuha sa papel? 7. Ano ang kahalagahan ng pagrerebisa ng unang draft ng abstrak?

8. Bakit kailangang gumamit ng mga simpleng salita at pangungusap sa abstrak? 9. Ano-anong mga paghahanda ang gagawin mo upang makalikha ng isang mahusay na abstrak? 10. Paano mo tatayain ang kahusayan ng isusulat mong abstrak?

HANDA KA NA BANG MAGSULAT NG ABSTRAK?

Pagsulat: Bumuo ng abstrak mula sa pananaliksik na ginawa sa asignaturang Pagbasa at Pagsusuri ng Iba’t ibang Teksto tungo sa Pananaliksik. Isaalang-alang ang mga pamantayan sa pagbuo ng abstrak. Gawin ito sa short bond paper.

Gawain: Manaliksik ng tiglimang papel-pananaliksik na kuwalitatibo at kuwantitatibo. Tipunin ang mga abstrak nito at paghambing-hambingin ang pagkakaiba mula sa paksa, nilalaman, implikasyon, at kalikasan o katangian.